ಒಂದೇ ನಂಬರ್ನ ಎರಡು ಥಾರ್ಗಳು: ಎರಡೂ ವಾಹನಗಳ ವಶಕ್ಕೆ
ಕಾಸರಗೋಡು: ಹಣಕಾಸು ಸಂಸ್ಥೆಯ ವಸೂಲಾತಿ ಏಜೆಂಟ್ಗಳ ಕಣ್ಣಿಗೆ ಬೀಳದಿರಲು ತನ್ನ ಮಹೀಂದ್ರಾ ಥಾರ್ ಕಾರಿಗೆ ನಕಲಿ ನೋಂದಣಿ ಸಂಖ್ಯೆ ಅಳವಡಿಸಿದ್ದ ಎನ್ನಲಾದ ವ್ಯಕ್ತಿಯೊಬ್ಬನ ಯೋಜನೆ, ಅದೇ ಸಂಖ್ಯೆಯ ಮತ್ತೊಂದು ಥಾರ್ ಕಾರಿನ ಪಕ್ಕದಲ್ಲೇ ವಾಹನ ನಿಲ್ಲಿಸಿದಾಗ ಬಯಲಾಗಿದೆ. ಬದಿಯಡ್ಕ ಸಮೀಪದ ಬೇಲಾ ಗ್ರಾಮದ ಕುಂಝಾರ್ ನಿವಾಸಿ ಫಕ್ರುದ್ದೀನ್ ಎಂಬಾತನ ಥಾರ್ ಕಾರು ಹಾಗೂ ಕಾಸರಗೋಡು ಪಟ್ಟಣದ ನೆಲ್ಲಿಕ್ಕುನ್ನು ನಿವಾಸಿ ಉಮ್ಮರ್ ರಶೀದ್ ಅವರ ಕಪ್ಪು ಬಣ್ಣದ ಥಾರ್ ಕಾರು ಒಂದೇ ನೋಂದಣಿ ಸಂಖ್ಯೆಯನ್ನು ಹೊಂದಿರುವುದು ಪತ್ತೆಯಾಗಿದೆ.
ಸೆಪ್ಟೆಂಬರ್ 12ರಂದು ಮಧ್ಯಾಹ್ನ ಸುಮಾರು 12.30ರ ವೇಳೆಗೆ ಉಪ್ಪಳ ಬಳಿಯ ಕೈಕಂಬದಲ್ಲಿ ಫಕ್ರುದ್ದೀನ್ ತನ್ನ ಥಾರ್ ಕಾರನ್ನು ನಿಲ್ಲಿಸಿದ್ದರು ಎನ್ನಲಾಗಿದೆ. ಇದೇ ವೇಳೆ ಸಮೀಪದ ಪ್ರದೇಶದಲ್ಲಿ ಉಮ್ಮರ್ ರಶೀದ್ ಅವರ ಥಾರ್ ಕಾರು ಕೂಡ ನಿಂತಿತ್ತು. ಎರಡೂ ವಾಹನಗಳಲ್ಲೂ KL 14 AJ 3008 ಎಂಬ ಒಂದೇ ನೋಂದಣಿ ಸಂಖ್ಯೆ ಕಂಡುಬಂದಿದೆ. ಇದನ್ನು ಗಮನಿಸಿದ ಸ್ಥಳೀಯ ಯುವಕರು ಅನುಮಾನಗೊಂಡು ಪೊಲೀಸರಿಗೆ ಮಾಹಿತಿ ನೀಡಿದ್ದಾರೆ. ಮಾಹಿತಿ ಪಡೆದ ಮಂಜೇಶ್ವರ ಪೊಲೀಸರು ಸ್ಥಳಕ್ಕೆ ತೆರಳಿ ಎರಡೂ ವಾಹನಗಳನ್ನು ವಶಕ್ಕೆ ಪಡೆದು ಪರಿಶೀಲನೆ ನಡೆಸಿದರು.
ಪೊಲೀಸರ ತನಿಖೆಯಲ್ಲಿ ಉಮ್ಮರ್ ರಶೀದ್ ಅವರ ಥಾರ್ ಕಾರಿಗೆ KL 14 AJ 3008 ಎಂಬ ನೋಂದಣಿ ಸಂಖ್ಯೆ ನಿಜವಾಗಿರುವುದು ದೃಢಪಟ್ಟಿದೆ. ಆದರೆ ಫಕ್ರುದ್ದೀನ್ ಅವರ ಥಾರ್ ಕಾರಿನ ನಿಜವಾದ ನೋಂದಣಿ ಸಂಖ್ಯೆ KL 14 AG 2557 ಆಗಿದ್ದು, ಅದಕ್ಕೆ KL 14 AJ 3008 ಎಂಬ ನಕಲಿ ನಂಬರ್ ಪ್ಲೇಟ್ ಅಳವಡಿಸಲಾಗಿತ್ತು ಎಂದು ಪೊಲೀಸರು ತಿಳಿಸಿದ್ದಾರೆ. ಹಣಕಾಸು ಸಂಸ್ಥೆಯಿಂದ ಬಾಕಿ ಸಾಲದ ಹಿನ್ನೆಲೆಯಲ್ಲಿ ವಾಹನವನ್ನು ವಶಕ್ಕೆ ಪಡೆಯುವ ಸಾಧ್ಯತೆ ಇದ್ದುದರಿಂದ, ವಸೂಲಾತಿ ಏಜೆಂಟ್ಗಳ ಕಣ್ಣಿಗೆ ಬೀಳದಿರಲು ನಕಲಿ ನೋಂದಣಿ ಸಂಖ್ಯೆ ಬಳಸಿದ್ದಾಗಿ ಫಕ್ರುದ್ದೀನ್ ಪೊಲೀಸರಿಗೆ ಹೇಳಿಕೆ ನೀಡಿದ್ದಾನೆ ಎನ್ನಲಾಗಿದೆ. ಆದರೆ, ಅದೇ ನೋಂದಣಿ ಸಂಖ್ಯೆಯ ಮತ್ತೊಂದು ಥಾರ್ ಕಾರಿನ ಸಮೀಪ ತನ್ನ ವಾಹನ ನಿಲ್ಲಿಸಿದ್ದರಿಂದ ನಕಲಿ ನಂಬರ್ ಪ್ಲೇಟ್ನ ವಿಚಾರ ಬೆಳಕಿಗೆ ಬಂದಿದೆ.
