ಆರ್ಬೆಟ್ಟು ಹೊಳೆಗೆ ಬಿದ್ದು ಯುವಕ ಸಾವು
ತೆಕ್ಕಟ್ಟೆ/ಹೆಬ್ರಿ: ಬೇಳೂರು ಗ್ರಾ.ಪಂ. ವ್ಯಾಪ್ತಿಯ ಕೋಣಬಗೆ ರೈಲ್ವೇ ಸೇತುವೆ ಸಮೀಪದ ಹಿರೇಹೊಳೆಯ ಆರ್ಬೆಟ್ಟು ಹೊಳೆಯಲ್ಲಿ ಅ. 22ರಂದು ಸಂಜೆ ಕಾಲು ಜಾರಿ ಹೊಳೆಗೆ ಬಿದ್ದು ಸ್ಥಳೀಯ ನಿವಾಸಿ ಪ್ರಶಾಂತ್‌ ಆಚಾರ್ಯ (24) ಮೃತಪಟ್ಟಿದ್ದಾರೆ.
ಕಾಲು ತೊಳೆಯಲೆಂದು ತೆರಳಿದ್ದ ಪ್ರಶಾಂತ್‌ ಕಾಲುಜಾರಿ ಹೊಳೆಗೆ ಬಿದ್ದರು. ನೀರಿನ ಒಳಹರಿವು ಅಧಿಕವಾಗಿದ್ದ ಪರಿಣಾಮ ಸೆಳೆತಕ್ಕೆ ಸಿಲುಕಿ ಮೃತಪಟ್ಟರು ಎನ್ನಲಾಗಿದೆ. ಪ್ರಶಾಂತ್‌ ಮೂರು ತಿಂಗಳಿಂದ ವೈದ್ಯಕೀಯ ಪ್ರತಿನಿಧಿಯಾಗಿ ಕಾರ್ಯನಿರ್ವಹಿಸುತ್ತಿದ್ದರು.
ನಾಪತ್ತೆಯಾದ ಯುವಕನ ಪತ್ತೆಗಾಗಿ ಮುಳುಗು ತಜ್ಞ ಈಶ್ವರ ಮಲ್ಪೆ ಅವರು ಸ್ಥಳಕ್ಕೆ ಬಂದಾಗ ಕತ್ತಲಾಗಿದ್ದರಿಂದ ಬೈಕ್‌ನ ಹೆಡ್ ಲೈಟ್‌ ಬೆಳಗಿಸಿ ಶೋಧಕಾರ್ಯ ಮುಂದುವರಿಸಿದರು. ಸ್ಥಳದಿಂದ ಅನತಿ ದೂರದಲ್ಲಿಯೇ ಮೃತದೇಹ ಪತ್ತೆಯಾಗಿದೆ. ಈ ಸಂದರ್ಭದಲ್ಲಿ ಸ್ಥಳದಲ್ಲಿ ನೂರಾರು ಮಂದಿ ಜಮಾಯಿಸಿದ್ದರು.
