ಶಿವಸೇನಾ ಶಾಸಕ ದುಬೈನಲ್ಲಿ ಸಾವು

ಮುಂಬಯಿ: ಮುಂಬಯಿಯ ಶಿವಸೇನಾ ಶಾಸಕ ರಮೇಶ್ ಲಟ್ಕೆ (52ವರ್ಷ) ಹೃದಯಸ್ತಂಭನದಿಂದ ದುಬೈನಲ್ಲಿ ಸಾವನ್ನಪ್ಪಿರುವುದಾಗಿ ಪಕ್ಷದ ಪದಾಧಿಕಾರಿಯೊಬ್ಬರು ತಿಳಿಸಿರುವುದಾಗಿ ವರದಿಯಾಗಿದೆ.

ರಮೇಶ್ ಲಟ್ಕೆ ಕುಟುಂಬ ಸದಸ್ಯರ ಜತೆ ದುಬೈ ಪ್ರವಾಸಕ್ಕೆ ತೆರಳಿದ್ದು, ಬುಧವಾರ ತಡರಾತ್ರಿ ಲಟ್ಕೆ ಅವರು ಹೃದಯಸ್ತಂಭನದಿಂದ ವಿಧಿವಶರಾಗಿದ್ದಾರೆಂದು ಪಕ್ಷದ ಪದಾಧಿಕಾರಿ ಪಿಟಿಐಗೆ ತಿಳಿಸಿದ್ದಾರೆ.

ರಮೇಶ್ ಲಟ್ಕೆ ಅವರು ಮುಂಬಯಿಯ ಪೂರ್ವ ಅಂಧೇರಿ ಕ್ಷೇತ್ರದಿಂದ ಎರಡು ಬಾರಿ ಶಿವಸೇನಾದ ಶಾಸಕರಾಗಿ ಆಯ್ಕೆಯಾಗಿದ್ದರು. ಶಾಸಕರಾಗುವ ಮುನ್ನ ಲಟ್ಕೆ ಬೃಹನ್ಮುಂಬಯಿ ಮುನ್ಸಿಪಲ್ ಕಾರ್ಪೋರೇಶನ್ ನ ಕಾರ್ಪೋರೇಟರ್ ಆಗಿದ್ದರು.