ಚಿತ್ರಮಂದಿರದ ಮಹಿಳೆಯರ ಶೌಚಾಲಯದಲ್ಲಿ ಮೊಬೈಲ್ ಇರಿಸಿ ವಿಡಿಯೊ ರೆಕಾರ್ಡ್: ಅಪ್ರಾಪ್ತ ಬಾಲಕನ ಬಂಧನ
ಬೆಂಗಳೂರು: ಚಿತ್ರಮಂದಿರವೊಂದರ ಮಹಿಳೆಯರ ಶೌಚಾಲಯದಲ್ಲಿಗೌಪ್ಯವಾಗಿ ಮೊಬೈಲ್ ಇರಿಸಿ ವಿಡಿಯೊ ರೆಕಾರ್ಡ್ ಮಾಡುತ್ತಿದ್ದ ನೇಪಾಳ ಮೂಲದ ಹದಿನೇಳು ವರ್ಷದ ಅಪ್ರಾಪ್ತನನ್ನು ಮಡಿವಾಳ ಠಾಣೆ ಪೊಲೀಸರು ಬಂಧಿಸಿದ್ದಾರೆ. ಕೃತ್ಯದಲ್ಲಿ ಭಾಗಿಯಾಗಿರುವ ಮತ್ತೊಬ್ಬ ಬಾಲಕ ತಲೆಮರೆಸಿಕೊಂಡಿದ್ದಾನೆ.
ಚಿಕ್ಕಮಡಿವಾಳದ ವಿ.ಪಿ. ರಸ್ತೆಯ ಸಂಧ್ಯಾ ಥಿಯೇಟರ್ನಲ್ಲಿ ತೆಲುಗು ಸಿನಿಮಾವೊಂದರ ರಾತ್ರಿ ಶೋ ನೋಡಲು ಮಹಿಳೆಯೊಬ್ಬರು ಕುಟುಂಬದ ಜತೆ ತೆರಳಿದ್ದರು. ರಾತ್ರಿ 9.15ರ ಸುಮಾರಿಗೆ ಇಂಟರ್ವೆಲ್ ಸಮಯದಲ್ಲಿ ಮಹಿಳೆ ಶೌಚಾಲಯಕ್ಕೆ ತೆರಳಿದ್ದಾಗ ಗೋಡೆ ಮೇಲೆ ಮೊಬೈಲ್ ಆನ್ ಮಾಡಿಟ್ಟಿರುವುದನ್ನು ಕಂಡು ಬೆಚ್ಚಿಬಿದ್ದಿದ್ದಾರೆ. ತಕ್ಷಣ ಸಹಾಯಕ್ಕೆ ಕಿರುಚಿಕೊಂಡು ಪಕ್ಕದ ಶೌಚಾಲಯದಲ್ಲಿದ್ದ ಅಪ್ರಾಪ್ತನನ್ನು ಹಿಡಿದುಕೊಂಡಿದ್ದರು.
ಆರೋಪಿಯನ್ನು ಸುತ್ತುವರಿದ ನಾಗರಿಕರು ಹಿಗ್ಗಾಮುಗ್ಗಾ ಥಳಿಸಿ ಪೊಲೀಸ್ ಸಹಾಯವಾಣಿ 112ಕ್ಕೆ ಕರೆ ಮಾಡಿದ್ದರು. ಸ್ಥಳಕ್ಕೆ ತೆರಳಿದ್ದ ಹೊಯ್ಸಳ ಸಿಬ್ಬಂದಿ ಆರೋಪಿಯನ್ನು ವಶಕ್ಕೆ ಪಡೆದು ಮೊಬೈಲ್ ಜಪ್ತಿ ಮಾಡಿದ್ದಾರೆ.
ಸಂತ್ರಸ್ತೆ ನೀಡಿದ ದೂರಿನನ್ವಯ ಪ್ರಕರಣ ದಾಖಲಿಸಿ ಆರೋಪಿಯನ್ನು ಬಂಸಿ ಬಾಲಮಂದಿರಕ್ಕೆ ಕಳಿಸಲಾಗಿದೆ. ಆರೋಪಿಯ ಮೊಬೈಲ್ ಜಪ್ತಿ ಮಾಡಿದ್ದು ಪರಿಶೀಲಿಸಲಾಗುತ್ತಿದೆ. ತಲೆಮರೆಸಿಕೊಂಡಿರುವವನ ಬಂಧನಕ್ಕೆ ಕಾರ್ಯಾಚರಣೆ ನಡೆಸಲಾಗುತ್ತಿದೆ ಎಂದು ತಿಳಿಸಿದ್ದಾರೆ.
