ಕಾರಿನಲ್ಲಿ ಗಾಂಜಾ ಪತ್ತೆ: ಮೂವರ ಬಂಧನ

ಹಾಸನ: ಪ್ರವಾಸಕ್ಕೆ ತೆರಳುತ್ತಿದ್ದ ಯುವಕರ ಕಾರಿನಲ್ಲಿ ಗಾಂಜಾ ಪತ್ತೆಯಾಗಿರುವ ಘಟನೆ ಹಾಸನ ಜಿಲ್ಲೆ ಅರಕಲಗೂಡು ತಾಲೂಕಿನ ಅಂಕನಾಯಕಹಳ್ಳಿ ಬಳಿ ನಡೆದಿದೆ.

ಬೆಂಗಳೂರಿನ ಕಿರಣ್, ಭಾರ್ಗವ, ವೆಂಕಟೇಶ್ ಎಂಬ ಮೂವರು ಆರೋಪಿಗಳಿಂದ ಗಾಂಜಾ ಜಪ್ತಿ ಮಾಡಲಾಗಿದೆ.
ಅತಿ ವೇಗವಾಗಿ ಮನಬಂದಂತೆ ಕಾರು ಚಾಲನೆ ಮಾಡಿಕೊಂಡು ಹೋಗುತ್ತಿದ್ದ ಮೂವರು ಯುವಕರನ್ನು ಪೊಲೀಸರು ತಡೆದು ಪರಿಶೀಲನೆಗೆ ಮುಂದಾಗಿದ್ದರು. ಆದರೆ ಮತ್ತಿನಲ್ಲಿದ್ದ ಯುವಕರು ಪೋಲೀಸರ ವಾಹನ ಪರಿಶೀಲನೆ ವೇಳೆಯೂ ವಾಹನ ನಿಲ್ಲಿಸದೆ ಎಸ್ಕೇಪ್ ಆಗಲು ಯತ್ನಿಸಿದ್ದಾರೆ. ಈ ವೇಳೆ ಅನುಮಾನ ಬಂದು ಪೊಲೀಸರು ಅವರ ಬೆನ್ನಟ್ಟಿ ಕಾರನ್ನು ನಿಲ್ಲಿಸಿದ್ದು, ಕಾರು ತಪಾಸಣೆ ಮಾಡಿದಾಗ ಗಾಂಜಾ ಪತ್ತೆಯಾಗಿದೆ. ಯುವಕರ ಅಜಾಗರೂಕತೆಯ ಡ್ರೈವಿಂಗ್ ನಿಂದ ಕೂದಲೆಳೆ ಅಂತರದಲ್ಲಿ ಪಾದಾಚಾರಿಗಳು ಪಾರಾಗಿದ್ದಾರೆ.

ಕಾರಿನಲ್ಲಿ 36 ಗ್ರಾಂ ನ ಗಾಂಜಾ ಪತ್ತೆಯಾಗಿದ್ದು, ಬಂಧಿತರು ಬೆಂಗಳೂರಿನ ಸುಂಕದಕಟ್ಟೆ ಮೂಲದವರು ಎಂದು ತಿಳಿದು ಬಂದಿದೆ. ಅರಕಲಗೂಡು ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.