ಇಂದಿನಿಂದ ಮಹಿಳಾ IPL ಆರಂಭ: 5 ತಂಡ 22 ಪಂದ್ಯಗಳು
ಮುಂಬಯಿ: 5 ತಂಡಗಳ ನಡುವೆ ಐಪಿಎಲ್‌ ಮಾದರಿಯಲ್ಲೇ ವನಿತಾ ಪ್ರೀಮಿಯರ್‌ ಲೀಗ್‌ (ಡಬ್ಲ್ಯುಪಿಎಲ್‌) ಇಂದಿನಿಂದ ಆರಂಭವಾಗಲಿದೆ.
ವಿಶ್ವದ ತಾರಾ ಆಟಗಾರ್ತಿಯರೆಲ್ಲ ಒಟ್ಟುಗೂಡುವ ಕಾರಣದಿಂದ ಈ ಟೂರ್ನಿ ಕ್ರಿಕೆಟ್‌ ಪ್ರೇಮಿಗಳಲ್ಲಿ ತೀವ್ರ ಕುತೂಹಲ ಮೂಡಿಸಿದೆ.
ಇದು ಒಟ್ಟು 22 ಪಂದ್ಯಗಳ ಮುಖಾಮುಖಿ. 87 ಆಟಗಾರ್ತಿಯರು ಕಣದಲ್ಲಿದ್ದಾರೆ. ಆತಿಥ್ಯ ಮುಂಬಯಿಗಷ್ಟೇ ಮೀಸಲು. ಇಲ್ಲಿನ ಬ್ರೆಬೋರ್ನ್ ಸ್ಟೇಡಿಯಂ ಮತ್ತು ಡಾ| ಡಿ.ವೈ. ಪಾಟೀಲ್‌ ಸ್ಟೇಡಿಯಂಗಳಲ್ಲಿ ಪಂದ್ಯಗಳು ಸಾಗುತ್ತವೆ. ಪ್ರತಿಯೊಂದು ತಂಡ ಎದುರಾಳಿ ತಂಡದ ವಿರುದ್ಧ ಎರಡು ಲೀಗ್‌ ಪಂದ್ಯಗಳನ್ನು ಆಡಲಿದೆ.
ಅಗ್ರಸ್ಥಾನ ಪಡೆದ ತಂಡ ನೇರವಾಗಿ ಫೈನಲ್‌ಗೆ ಲಗ್ಗೆ ಇಡಲಿದೆ. 2-3ನೇ ಸ್ಥಾನ ಪಡೆದ ತಂಡಗಳು ಎಲಿಮಿನೇಟರ್‌ ಸುತ್ತಿನಲ್ಲಿ ಆಡಲಿವೆ. ಗೆದ್ದ ತಂಡಕ್ಕೆ ಫೈನಲ್‌ ಟಿಕೆಟ್‌ ಲಭಿಸಲಿದೆ.
ಮಾ. 26ರಂದು ಪ್ರಶಸ್ತಿ ಕದನ ಏರ್ಪಡಲಿದೆ. ಶನಿವಾರದ ಉದ್ಘಾಟನ ಪಂದ್ಯದಲ್ಲಿ ಮುಂಬೈ-ಗುಜರಾತ್‌ ಎದುರಾಗಲಿವೆ.
5 ತಂಡಗಳೆಂದರೆ, ಮುಂಬೈ ಇಂಡಿಯನ್ಸ್‌, ರಾಯಲ್‌ ಚಾಲೆಂಜರ್ ಬೆಂಗಳೂರು, ಗುಜರಾತ್‌ ಜೈಂಟ್‌, ಡೆಲ್ಲಿ ಕ್ಯಾಪಿಟಲ್ಸ್‌ ಮತ್ತು ಯುಪಿ ವಾರಿಯರ್. ಕ್ರಮವಾಗಿ ಹರ್ಮನ್‌ಪ್ರೀತ್‌ ಕೌರ್‌, ಸ್ಮತಿ ಮಂಧನಾ, ಬೆತ್‌ ಮೂನಿ, ಮೆಗ್‌ ಲ್ಯಾನಿಂಗ್‌, ಅಲಿಸ್ಸಾ ಹೀಲಿ ನಾಯಕಿಯರಾಗಿದ್ದಾರೆ. ನಾಯಕಿಯರಲ್ಲಿ ಆಸ್ಟ್ರೇಲಿಯದ ಗರಿಷ್ಠ ಮೂವರಿದ್ದಾರೆ. ಉಳಿದಿಬ್ಬರು ಭಾರತೀಯರು.
