ಗುಂಡಿನ ದಾಳಿಗೆ ಟೆಕ್ ಮಹೀಂದ್ರಾ ಏಷ್ಯಾ ಹೆಡ್ ಬಲಿ
ಚಂಡೀಗಢ: ಪಾರ್ಕಿಂಗ್‌ ವಿವಾದದ ಹಿನ್ನೆಲೆಯಲ್ಲಿ ಫರೀದಾಬಾದ್‌ನಲ್ಲಿ ನೆರೆಮನೆಯ ವ್ಯಕ್ತಿಯಿಂದ ಶುರುವಾದ ಗಲಾಟೆ ಕೊಲೆಯಲ್ಲಿ ಅಂತ್ಯವಾಗಿದೆ. ಫ್ಯಾಮಿಲಿಯ ಮದುವೆಗಾಗಿ ಸಿಂಗಾಪುರದಿಂದ ಬಂದಿದ್ದ ಟೆಕ್ ಮಹೀಂದ್ರಾ ಏಷ್ಯಾ ಹೆಡ್ ಗುಂಡಿನ ದಾಳಿಗೆ ಬಲಿಯಾಗಿದ್ದಾರೆ.
ಟೆಕ್ ಮಹೀಂದ್ರಾದ ಏಷ್ಯಾ-ಪೆಸಿಫಿಕ್ ವಲಯದ ಮಾಜಿ ಪ್ರಾದೇಶಿಕ ವ್ಯವಹಾರ ಮುಖ್ಯಸ್ಥರಾಗಿದ್ದ ಪರಮ್‌ಜೀತ್ ಧನಕರ್ ಅವರನ್ನು ಗುಂಡಿಕ್ಕಿ ಕೊಂದ ಆರೋಪ ಹೊತ್ತಿರುವ ವ್ಯಕ್ತಿಯನ್ನು ಬಲ್ಲಬ್‌ಗಢದ ಡಿಎಲ್‌ಎಫ್ ಚೌಕ್‌ನಲ್ಲಿ ಬಂಧಿಸಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಮೋಹನ್ ಅಲಿಯಾಸ್ ಮೋನು ಶರ್ಮಾ ಎಂದು ಗುರುತಿಸಲಾದ ಆರೋಪಿಯು, ಸೆಕ್ಟರ್ 21ಸಿ (Sector 21C) ಯಲ್ಲಿ ಧನಕರ್ ಮೇಲೆ ಗುಂಡು ಹಾರಿಸಿದ್ದ. ಆರೋಪಿಯು ಸುಮಾರು 14-15 ಸುತ್ತು ಗುಂಡುಗಳನ್ನು ಹಾರಿಸಿದ್ದ. ಅದರಲ್ಲಿ ಮೂರರಿಂದ ನಾಲ್ಕು ಗುಂಡುಗಳು ಧನಕರ್‌ಗೆ ತಗುಲಿದ ಪರಿಣಾಮ, ಅವರು ಸ್ಥಳದಲ್ಲೇ ಮೃತಪಟ್ಟರು.
