ಮಂಗಳೂರು: ಕತ್ತಿಯಿಂದ ಇರಿದು ಕೊಲೆಗೆ ಯತ್ನ: ಆರೋಪಿಯ ಬಂಧನ
ಮಂಗಳೂರು: ನಗರದ ಸಿಟಿ ಸೆಂಟರ್ ವೀಕ್ಷಿಸಲು ಬಂದಿದ್ದ ವ್ಯಕ್ತಿಯೊಬ್ಬರು ಲೇಡಿಗೋಶನ್ ಆಸ್ಪತ್ರೆ ಸಮೀಪದ ಬಸ್ ತಂಗುದಾಣದಲ್ಲಿ ನಿಂತಿದ್ದಾಗ, ಮೊಬೈಲ್ ಫೋನ್ ನೀಡಲು ನಿರಾಕರಿಸಿದ್ದಕ್ಕೆ ಅಪರಿಚಿತ ವ್ಯಕ್ತಿಯೊಬ್ಬ ಕತ್ತಿಯಿಂದ ಇರಿದು ಕೊಲೆಗೆ ಯತ್ನಿಸಿರುವ ಘಟನೆ ಸಂಭವಿಸಿದೆ.
ದಾಳಿಯಲ್ಲಿ ತೀವ್ರವಾಗಿ ಗಾಯಗೊಂಡ ಸಂತ್ರಸ್ತ ಸಿರಾಜು ಬಿ.ಎನ್. ಅವರು ನೀಡಿದ ದೂರಿನಂತೆ, ದಾಳಿ ನಡೆಸಿದ ಆರೋಪಿ ಇರ್ಷಾದ್ ಎಂಬಾತನ ವಿರುದ್ಧ ಮಂಗಳೂರು ಸೌತ್ (ಪಾಂಡೇಶ್ವರ) ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.ಮಂಗಳೂರು ಸುದ್ದಿ ಸೇವೆ
ಅಕ್ಟೋಬರ್ 11, 2026 ರಂದು ಸಂಜೆ ಸುಮಾರು 6:30 ಕ್ಕೆ ಸಿರಾಜು ಅವರು ಮಂಗಳೂರು ಸಿಟಿ ಸೆಂಟರ್ ಮಳಿಗೆಗೆ ಬಂದಿದ್ದರು. ಬಳಿಕ ರಾತ್ರಿ ಸುಮಾರು 10:00 ಗಂಟೆಯ ವೇಳೆಗೆ ಲೇಡಿಗೋಶನ್ ಆಸ್ಪತ್ರೆ ಬಳಿಯ ಬಸ್ ಸ್ಟಾಪ್‌ನಲ್ಲಿ ಕುಳಿತು ಮೊಬೈಲ್ ಫೋನ್ ನೋಡುತ್ತಿದ್ದರು. ಈ ವೇಳೆ ಅಲ್ಲಿಗೆ ಬಂದ ಆರೋಪಿ ಇರ್ಷಾದ್, ಮಲಯಾಳಂ ಭಾಷೆಯಲ್ಲಿ “ಇಲ್ಲಿ ಏನು ಮಾಡುತ್ತಿದ್ದೀಯಿ?” ಎಂದು ಕೇಳಿದ್ದಾನೆ. ಅದಕ್ಕೆ ಸಿರಾಜು ಮೊಬೈಲ್ ನೋಡುತ್ತಿರುವುದಾಗಿ ಉತ್ತರಿಸಿದ್ದಾರೆ.
ತಕ್ಷಣವೇ ಆರೋಪಿ “ಮೊಬೈಲ್ ಫೋನ್ ನೋಡಲು ಕೊಡು” ಎಂದು ಕೇಳಿದ್ದು, ಸಿರಾಜು ನಿರಾಕರಿಸಿದ್ದಾರೆ. ಇದರಿಂದ ಕೆರಳಿದ ಆರೋಪಿ, “ಫೋನ್ ಕೊಡದಿದ್ದರೆ ಜೀವಸಹಿತ ಬಿಡುವುದಿಲ್ಲ” ಎಂದು ಬೆದರಿಕೆ ಹಾಕಿದ್ದಾನೆ. ಸಿರಾಜು ಮೊಬೈಲ್ ನೀಡದೇ ಇದ್ದಾಗ ಮತ್ತಷ್ಟು ಆಕ್ರೋಶಗೊಂಡ ಆರೋಪಿ ಇರ್ಷಾದ್, ತನ್ನ ಬಳಿಯಿದ್ದ ಚೂರಿಯನ್ನು ತೆಗೆದು “ನಿನ್ನನ್ನು ಕೊಲ್ಲುತ್ತೇನೆ” ಎಂದು ಸಿರಾಜು ಅವರ ಕುತ್ತಿಗೆಗೆ ಇರಿಯಲು ಬಂದಿದ್ದಾನೆ. ತಕ್ಷಣ ಎಚ್ಚೆತ್ತ ಸಿರಾಜು ತಪ್ಪಿಸಿಕೊಳ್ಳಲು ಯತ್ನಿಸಿದಾಗ, ಚೂರಿಯು ಅವರ ಮೂಗಿನ ಎಡಬದಿಗೆ ತಾಗಿ ಮೂಗು ಹರಿದುಹೋಗಿದೆ.
